សេចក្តីថ្លែងការណ៍របស់សហគមន៍ខ្មែរ សម្រាប់កិច្ចប្រជុំតុមូល សហរដ្ឋអាមេរិក-សហភាពអឺរ៉ុប ថ្ងៃទី១៥ ខែតុលា ស្តីពីកម្ពុជា។

យើងទាំងអស់គ្នាជាតំណាងសហគមន៍ខ្មែរទូទាំងពិភពលោក ចេញសេចក្តីថ្លែងការណ៍មួយ មុនកិច្ចប្រជុំតុមូលសហរដ្ឋអាមេរិក-សហភាពអឺរ៉ុប ដែលនឹងធ្វើឡើងនៅថ្ងៃទី ១៥ ខែតុលា ស្តីពីកម្ពុជា។ សេចក្តីថ្លែងការណ៍នេះ បន្ទបន្ថែមពីលើការអំពាវនាវជាបន្ទាន់នៅថ្ងៃទី ១ ខែសីហា ឆ្នាំ ២០២៥ របស់អង្គការសង្គមស៊ីវិលនៅកម្ពុជាជាង ១០០ អង្គការ ដែលធ្វើការប្រកាសរួមមួយ ស្នើសុំឲ្យអន្តរជាតិ សម្របសម្រួលគ្នា ធ្វើសកម្មភាពឲ្យកាន់តែខ្លាំងឡើង ដើម្បីដោះស្រាយបញ្ហានៅកម្ពុជា។

កិច្ចប្រជុំរបស់សហគមន៍ខ្មែរនេះធ្វើឡើងក្នុងពេលដ៏សំខាន់មួយ ដែលកម្ពុជាកំពុងតែប្រឈមមុខទៅនឹងការកើនឡើងនៃការគាបសង្កត់ និងការញុះញង់ឆ្លងហួសព្រំដែន គឺឈ្លានពានចូលទៅក្នុងអធិបតេយ្យភាពរបស់កម្ពុជា ដោយប្រទេសចិន វៀតណាម ព្រមទាំងប្រទេសថៃ ក្នុងពេលថ្មីៗនេះ។

កិច្ចប្រជុំតុមូលនឹងធ្វើឡើងប៉ុន្មានថ្ងៃប៉ុណ្ណោះមុនខួបនៃកិច្ចព្រមព្រៀងសន្តិភាពទីក្រុងប៉ារីសឆ្នាំ ១៩៩១ ដែលជាឱកាសដ៏សំខាន់មួយដើម្បីបញ្ជាក់ រំឮកឡើងវិញនូវការប្តេជ្ញាចិត្តរបស់អន្តរជាតិ ក្នុងការរក្សាអធិបតេយ្យភាព និងលទ្ធិប្រជាធិបតេយ្យរបស់កម្ពុជា។

យើងនឹងជំរុញឲ្យដៃគូអន្តរជាតិធ្វើសកម្មភាពជាអាទិភាពបន្ទាន់ចំនួនពីរគឺ៖

• ការពារអធិបតេយ្យភាព៖ ព្រំដែនរបស់ប្រទេសកម្ពុជាត្រូវបានបំផ្លាញដោយការទន្ទ្រានផ្នែកយោធា និងសេដ្ឋកិច្ចដោយផ្ទាល់របស់ប្រទេសចិន និងការពង្រីកឥទ្ធិពលរបស់វៀតណាម។ វិបត្តិព្រំដែនកម្ពុជា-ថៃ នៅពេលថ្មីៗនេះ ឆ្លុះបញ្ចាំង និងធ្វើឲ្យកាន់តែធ្ងន់ធ្ងរទៅ ដែលជាគំរូនៃការបាត់បង់អធិបតេយ្យភាព អស់រយៈពេលជាច្រើនទសវត្សរ៍មកហើយ គឺបញ្ជាក់ឲ្យឃើញពីតម្រូវការបន្ទាន់និងចាំបាច់របស់សហគមន៍អន្តរជាតិ ក្នុងការសម្របសម្រួលដោះស្រាយ។

• បញ្ចប់ការគាបសង្កត់ដែលកាន់តែកើនឡើង៖ របបនេះបានលុបបំបាត់ការប្រឆាំងផ្នែកនយោបាយ បំបិទប្រព័ន្ធផ្សព្វផ្សាយ និងបានប្រែក្លាយការបោះឆ្នោត ឲ្យទៅទៅជាការតែងតាំងតពូជទៅវិញ។ ការគាបសង្កត់កាន់តែខ្លាំងឡើងនេះ មិនមែនជាឧប្បត្តិហេតុដាច់ដោយឡែកនោះទេ ប៉ុន្តែវាជាផ្នែក១នៃគំរូដែលគេអនុវត្តន៍ជាច្រើនទសវត្សរ៍មកហើយ រហូតដល់ឆ្លងកាត់ព្រំដែនទៀតផងនៅពេលឥឡូវនេះ។ គឺមានតាំងពីការចាប់ខ្លួនអ្នករិះគន់ឃ្លាំមើលព្រំដែន ការសំដៅយកមេដឹកនាំសហជីពដូចជា លោក រ៉ុង ឈុន ជាដើម រហូតដល់ការគំរាមវាយប្រហារឆ្លងព្រំដែន រួមទាំងការធ្វើឃាតតំណាងរាស្រ្តគណបក្សប្រឆាំង លោក លឹម គឹមយ៉ា និងការបង្ខំឲ្យសកម្មជនដែលបាននិរទេសខ្លួន ឲ្យវិលត្រឡប់ទៅកម្ពុជាវិញ។ របបនេះកំពុងបង្កើនយុទ្ធនាការដើម្បីបំបិទមាត់អ្នកប្រឆាំងនៅគ្រប់ទីកន្លែងទាំងក្នុងនិងក្រៅប្រទេស។

អស់រយៈពេល ៤៥ ឆ្នាំមកហើយដែលរបបនេះបានបន្តអនុញ្ញាតឲ្យមានការញុះញង់រំលោភបំពានដោយគ្មានបញ្ហា។ របបនេះយកភាពស្របច្បាប់របស់ខ្លួន មកធ្វើសកម្មភាពដើម្បីក្តាប់អំណាច មិនមែនដើម្បីការពារប្រទេសជាតិទេ។ សហគមន៍យើងគាំទ្រយុទ្ធសាស្រ្តគោលដៅដែលភ្ជាប់ ជំនួយសេដ្ឋកិច្ច ពាណិជ្ជកម្ម ទៅនឹងលក្ខខណ្ឌនៃការចូលរួមកែលំអសិទ្ធិមនុស្ស លទ្ធិប្រជាធិបតេយ្យ និងរក្សាការងារដែលមាន ប្រកបដោយភាពជាក់ស្តែង។

កម្ពុជាត្រូវការរដ្ឋាភិបាល និងគណបក្សប្រឆាំងដែលការពារអធិបតេយ្យភាព និងផលប្រយោជន៍ បូរណភាពទឹកដីរបស់កម្ពុជា។

ការការពារអធិបតេយ្យភាព និងលទ្ធិប្រជាធិបតេយ្យរបស់កម្ពុជា មិនត្រឹមតែជាការប្តេជ្ញាចិត្តនៃកិច្ចព្រមព្រៀងសន្តិភាពទីក្រុងប៉ារីសប៉ុណ្ណោះទេ គឺវាមានសារៈសំខាន់ខ្លាំងណាស់ ចំពោះស្ថិរភាពក្នុងតំបន់ បូរណភាពទីផ្សារការងារ និងការផ្តល់ទំនុកចិត្តដល់ដៃគូអន្តរជាតិ។